Белоруските власти го осудија на 10 години затвор добитникот на Нобелова награда за мир

Власта на Лукашенко го прогонува со оправдување дека шверцувал пари во готовина и потоа со истите финансирал активности на опозицијата, односно антивладини демонстрации

Судот во Белорусија го осуди на 10 години затвор Алеш Бељацки, добитникот на Нобелова награда за мир. На Бељацки му се закануваа максимални 12 години затвор, а според Центарот за човекови права „Весна“ белорускиот режим го осудил за шверц и финансирање активности кои грубо го кршеле јавниот ред и мир.

Неговите поддржувачи ја осудија ваквата одлуката на судот велејќи дека авторитарниот режим на белорускиот претседател Александар Лукашенко се обидува на ваков начин да го замолчи.

Пресудата следува по исклучително краток судски процес кој започна на 5 јануари годинава.

Бељацки беше уапсен на антивладини протести во 2021 година, а лани заедно со активисти од Русија и Украина ја добија Нобеловата награда за мир.

Власта на Лукашенко го прогонува со оправдување дека шверцувал пари во готовина и потоа со истите финансирал активности на опозицијата односно антивладини демонстрации.

При доделувањето на Нобеловата награда за мир, од норвешкиот Нобелов комитет порачаа дека белоруските власти постојано се обидуваат да го замолчат Бељацки, но тој и покрај огромните тешкотии не отстапува ни педа во неговата борба за човекови права и демократија во Белорусија.