БЕЛГРАД (АА) – Премиерката на Србија, Ана Брнабиќ, денес разговараше со специјалниот пратеник на Обединетото Кралство за Западен Балкан, Стјуарт Вилијам Пич, за унапредување на билатералните односи и за ситуацијата во регионот, пренесува Анадолу.
Брнабиќ нагласи дека Србија е определена за јакнење на соработката со Обединетото Кралство, при што особено го истакна значењето на економската соработка.
Таа укажала на тоа дека трговијата со услуги во текот на 2022 година надминала една милијарда и 300 милиони евра во вкупна вредност, особено нагласувајќи ја важноста од продлабочувањето на соработката во областа на образованието, културата, науката, ИТ-секторот и енергетиката за билатералните односи.
Како што е наведено во соопштението на Владата на Србија, Брнабиќ истакнала дека регионалната соработка е еден од надворешнополитичките приоритети на Србија, на што Србија интензивно работи.
„Кога станува збор за односите со Приштина, таа предочи дека услов за продолжување на процесот на нормализација на односите меѓу Белград и Приштина е исполнувањето на претходно договорените обврски. Премиерката објасни дека тоа е единствен начин за надминување на отворените прашања и постигнување на заемно прифатливо решение, нагласувајќи дека зачувувањето на мирот и стабилноста претставува основен приоритет на Белград“, се наведува во соопштението.
Пич ја изнел определбата на Обединетото Кралство за зачувување на мирот и напредокот на регионот, како и дека Лондон го поддржува Берлинскиот процес и сите други иницијативи што придонесуваат за унапредување на конкретната соработка во регионот, соопшти Владата на Србија.
На состанокот присуствуваше и амбасадорот на Обединетото Кралство во Белград, Едвард Фергусон.
