Белата куќа му се заблагодари на Илон Маск за неговата служба, откако милијардерот објави дека го прекинува своето учество во администрацијата на претседателот Доналд Трамп, изјави портпаролката на претседателот.
„Му благодариме за неговата работа. Му благодариме што го започна Одделот за владина ефикасност, а напорите за намалување на расипништвото, измамите и злоупотребите ќе продолжат“, изјави портпаролката на Белата куќа, Каролин Ливит, за новинарите.
Таа одби да коментира понатаму за заминувањето на милијардерот кој го критикуваше својот близок сојузник Трамп за прв пат оваа недела.
Маск вчера потврди дека ја завршува својата мисија за намалување на федералните трошоци по четири месеци учество во невиден експеримент.
„Како што мојот мандат како специјален владин службеник се ближи кон крајот, би сакал да му се заблагодарам на претседателот Доналд Трамп што ми даде можност да ги намалам непотребните трошоци“, напиша претприемачот на својата социјална платформа „икс“ вчера.
ИЗВОР: ТВ 21
