Македонската економија е четврта во Европа, уверува премиерот Христијан Мицкоски, откако Заводот за статистика објави дека растот на БДП за првиот квартал од година е 3%.
Премиерот додава дека промената се гледа во секојдневието и таа се должи на реформите, подобрувањето на продуктивноста и вработувањето. Мицкоски вели дека растат странските инвестиции и се стабилизира индустриското производство.
Според него, овие бројки сепак не се доволни и Владата во иднина ќе работи на раст повеќе од 4%, но постојат сигнали дека економијата оди напред, а еден таков е креирањето на нови 10 илјади работни места за првите два квартала.
„Според прелиминарните податоци на Државниот завод за статистика, во првиот квартал на 2025 година, реалниот раст на Бруто домашниот производ откако е избрана оваа Влада, трет квартал по ред е 3 или повеќе проценти, а прилагодениот согласно сезонските и календарските податоци е 3,2% тоа е бројката којашто ја објавува „Евростат“. Со тоа, практично на досега објавените параметри коишто ги објавил „Евростат“, македонската економија е рангирана на четврто место, веднаш позади Ирска, Данска и Полска.“, вели Мицкоски.
ИЗВОР: ТВ 21
