Измина цела година откако во јануари 2024 беше донесен Законот за употреба на македонскиот јазик.
Законот кој наиде на поддршка од македонистите и лингвистите и кој требаше да придонесе за унапредување на македонскиот јазик до ден денес не се спроведува.
Во изјава за Трн.мк проф. д-р Елизабета Бандиловска, остро реагира на непочитувањето на Законот, оценувајќи дека проблемот започнува уште од градинките, продолжува во образовниот процес, а кулминира во јавните институции. „Сè уште не се почитува јазикот во таа официјална форма во која треба да се почитува, на ниту едно ниво – ни за наставници, ни за новинари, ни за пратеници,“ вели Бандиловска.
Според неа, најголемите предизвици за македонскиот стандарден јазик е тоа што сè помалку е присутен и почитуван во јавниот дискурс. Наставниците и професорите често зборуваат на дијалект, дури и во градинките, што значително влијае на јазичната писменост на децата. Голем број од студентите што завршуваат на педагошките факултети немаат доволно квалитет за да бидат носители на јазичната култура. „Јазикот не го губиме надвор – го губиме дома,“ предупредува Бандиловска, посочувајќи дека англискиот јазик доминира во јавниот и образовниот простор.
Законот за употреба на македонскиот јазик предвидува вработување на лиценцирани лектори во сите јавни институции, потоа формирање на Инспекторат, доделување стипендии за студирање македонски јазик, отворање на нови лекторати, како и Национална стратегија за македонскиот јазик, но ништо од тоа до овој момент не е реализирано.
ИЗВОР: racin.mk
