Британскиот премиер Кир Стармер ја разгледува опцијата неуспешните баратели на азил од Обединетото кралство да бидат испратени на Балканот, каде би биле сместени во таканаречени „центри за враќање“ во странство.
Како што објавува лондонски „Тајмс“, земјите со кои британската влада би разговарала се Албанија, Босна и Херцеговина, Србија и Северна Македонија. Според извори на весникот во британската влада потенцијалните земји сеуште не се контактирани и сеуште се работи за рана фаза на планот.
– Владата е во „многу рана фаза“ на дискусии околу оваа идеја и е заинтересирана да дознае повеќе за тоа што прави Италија во Албанија. – Тајмс.
Иралијанската влада инаку веќе склучи таков договор со Албанија за праќање на емигранти во кампови, но неколку италијански судови го блокираа тој договор и засега планот е паузиран. Според извештајот на Migration Watch UK, заклучно со вчера, повеќе од 5.200 мигранти влегле во Британија преку мали чамци во 2025 година.
Претходно Конзервативците изготвија план за Руанда – според кој оние што пристигнуваа со мали чамци требаше да добијат билет во еден правец до африканската држава, без разлика дали на крајот ќе бидат прогласени за подобни за азил во Обединетото Кралство или не.
Но, после одлуката на британските судии и овој план не се реализира. Минатата недела, Европската унија објави дека предлага да им дозволи на земјите членки да воспостават таканаречени центри за враќање. Идејата беше поддржана од Меѓународната организација за миграција на ОН, која понуди да „советува и асистира државите во осмислувањето и спроведувањето на иновативна политика за враќање, која е ефикасна и усогласена со европското и меѓународното право“.
Извор: 24vesti.mk
