АНКАРА (АА) – Азербејџанскиот претседател Илхам Алиев повика на мир и стабилност во регионот на Кавказот, пренесува Анадолу.
Церемонијата на отворање на 2. Азербејџански национален урбан форум организиран од Државниот комитет за урбанистичко планирање и архитектура на Азербејџан во соработка со Програмата на Обединетите нации за човечки населби (UN-Habitat) се одржа во провинцијата Зангилан како дел од Урбаната недела на Азербејџан, објави државната новинска агенција АЗЕРТАК.
„Сакаме мир во Азербејџан. Мислам дека она што го гледаме овде во Зангилан покажува дека сакаме мир. Сакаме да ја обновиме земјата, да ги донесеме нашите бегалци и да живееме мирно“, рече Алиев за време на церемонијата. „Сакаме мир на Кавказот. Тој е достапен и изборот треба да го направи Ерменија“.
Алиев рече дека по завршувањето на Втората војна за Карабах, од азербејџанскиот буџет се потрошени 7 милијарди долари за обнова на ослободените територии, меѓу кои и Зангилан.
За антитерористичката операција спроведена на 19 септември, Алиев рече: „Антитерористичката операција траеше помалку од 24 часа. Сега сите знаат како заврши. Дали продолживме? Не, сопревме. Немавме никакви намери да продолжиме“.
Нагласувајќи дека Азербејџан го признава територијалниот интегритет на Ерменија, Алиев рече: „Да имавме други намери, на 20 септември работите немаше да сопрат. Сакам сите да го знаат тоа. Ерменското раководство, оние кои стојат зад нив и оние кои можеби кројат некои неприфатливи планови против Азербејџан.“
Алиев ги повика Азербејџан и Ерменија да почнат да работат на нацрт мировниот договор по антитерористичката операција.
„Откако Азербејџан го поврати својот суверенитет на 20 септември, ќе биде полесно да се постигне решение и да се потпише мировен договор што е можно поскоро“, рече Алиев.
Азербејџанскиот претседател, исто така, ги повика завојуваните страни активно да работат на делимитација на границата и да стават крај на долготрајниот конфликт.
