Авто салонот JLR Brooklyn поднесе тужба против поранешен сопственик на Lamborghini откако откри дека километражата на суперавтомобилот, кој уште бил под гаранција кога бил откупен од салонот, била вратена за повеќе од 20.000 километри.
Обвинетиот Нигал Тилан добил понуда за откуп од 190.000 долари за неговиот Huracan Evo Spider од 2023 година во јуни. Тој ја искористил понудената сума за да купи Range Rover, без авто салонот да знае за измамата.
Проблемот настанал кога JLR Brooklyn го продале спорниот Huracan, верувајќи дека автомобилот поминал само 2.100 километри. Тие биле предупредени за големата разлика во километражата дури кога новиот сопственик го однел автомобилот во овластен дилер на Lamborghini во Тексас на сервис.
Според извештајот од сервисот, техничарот го скенирал возилото и открил дека иако километражата покажувала 2.100 км, контролната единица на моторот (ECU) всушност бележи 23.365 км.
Во тужбата се тврди дека автомобилот бил опремен со уред за блокирање што го спречувал да ја прикаже точната километража. Како резултат на тоа, километражата морала да се замени, по цена од 6.300 долари. JLR Brooklyn бил принуден да му го врати целиот износ на купувачот и да ги покрие сите трошоци за транспорт.
Тие сега бараат отштета од Тилан и неговата компанија, Cross Feen, тврдејќи дека го прекршиле Федералниот закон за километража и дека се виновни за измама и прекршување на договор. Во тужбата се наведува дека вистинската километража на возилото Huracan „значително ја намалила неговата вредност и очигледно ќе достигне многу пониска цена“ кога ќе се препродаде.
Иако манипулирањето со километражата не е ништо ново, овој случај служи како потсетник дека и дилерите можат да станат жртви. Со користење на едноставни OBD2 скенери, JLR Brooklyn можел да ја потврди вистинската километража на возилото пред да го прифати за замена, со што ќе избегнел поголема штета.
Извор: kurir.mk
