АНКАРА (АА) – Австралискиот премиер Ентони Албанез изјави дека животот на секој Палестинец е исто толку важен како и животот на секој Израелец, наведувајќи дека треба да се вложат сите напори за заштита на цивилите, пренесува Анадолу.
Како што јави „Еј-би-си њуз“, Албанез во Мелбурн говорел за израелско-палестинскиот конфликт.
Албанез изрази загриженост поради зголемувањето на бројот на загинати цивили во Газа и нагласи дека треба да се направи сѐ тие да се заштитат.
„Животот на секој Палестинец е важен, како и животот на секој Израелец“, нагласи Албанез истакнувајќи дека израелскиот напад врз бегалскиот камп Џабалија во Газа предизвикува голема загриженост.
Тој наведе дека се состанал со австралиски граѓани во чии семејства има членови што се убиени во Газа и дека тие бараат од сојузната Влада „како што се бараат правата за израелските жртви, за заробениците и нивните семејства, истото да се стори и за нив.“
Во израелските напади во Појасот Газа во изминатите 24 часа загинаа уште 265 Палестинци, со што вкупниот број е зголемен на 9.061.
