„Анора“, приказната за њујоршка сексуална работничка која добива нова шанса во животот откако ќе се омажи за богат руски клиент, доминираше на 97. Оскари, освојувајќи пет награди, меѓу кои и за најдобар филм. „Бруталист“ се закити со три оскари, а „Емилија Перез“ со два, иако имаше дури 13 номинации.
Главната ѕвезда на „Анора“ Мајки Медисон ја победи Деми Мур за Оскарот за најдобра актерка, додека Шон Бејкер стана првата личност која добила четири оскари за еден филм. Бејкер славеше како продуцент, режисер, сценарист и монтажер на „Анора“.
Најдобрите актери за 2024: Ејдриен Броди, Мајки Медиосн, Зое Салдана и Киран Калкин (Фото: Тајмс)
„Анора“ бил снимен за само шест милиони долари, што е мала сума за холивудските стандарди, но излезе како победник од непредвидливата оскаровска трка, во која претходно повеќе шанси им се даваа на „Емилија Перез“ и „Бруталист“. „Анора“ беше објавен од независниот дистрибутер „Неон“ и на крајот заработи 40 милиони долари.
„Ако правите независни филмови, ве молам, продолжете со тоа. Ни требаат повеќе. Ова е доказ“, изјави Бејкер.
Ејдриен Броди го освои вториот Оскар за најдобар актер, 22 години по „Пијанист“, овојпат за улогата на еврејски мигрант и архитект во „Бруталист“. За најдобри споредни улоги беа наградени Зое Салдана за „Емилија Перез“ и Киран Калкин за „Вистинска болка“, кои беа без конкуренција во оваа сезона на филмски награди.
Бразилскиот „Уште сум тука“ е прогласен за најдобар странски филм, додека хрватскиот „Човекот кој не можеше да молчи“ не победи во категоријата краток игран филм.
ИЗВОР: sdk.mk
