КУДС (ЕРУСАЛИМ) (АА) – Речиси една третина од американските Евреи се согласуваат со обвинувањата дека Израел извршил „геноцид“ во Појасот Газа, додека 60 отсто го поддржуваат формирањето независна палестинска држава, покажа најновото истражување, јавува Анадолу.
Истражувањето на Центарот за јавни прашања Ерусалим, приватен десничарски израелски тинк-тенк, е спроведено во периодот меѓу 9 и 11 мај и опфати 511 американски Евреи.
„Приближно една третина од испитаниците се согласија со обвинувањата дека Израел врши геноцид во Газа, додека околу половина не се согласуваат“, се наведува во извештајот.
Анкетата покажа дека 17,4 отсто од испитаниците јасно се согласуваат, 12,5 отсто се согласуваат со обвинувањата, додека 24,8 отсто не се согласуваат и 26,6 отсто строго не се согласуваат, а 18,5 отсто ниту се согласуваат ниту не се согласуваат.
Израел започна брутална офанзива врз Појасот Газа од 7 октомври минатата година по нападот на Хамас, при што загинаа повеќе од 36.400 Палестинци, од кои огромното мнозинство жени и деца, додека над 82.600 се повредени.
Речиси осум месеци од почетокот на израелската војна, огромни делови од Газа се во урнатини, а владее блокада на храна, чиста вода и лекови.
Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине својата операција во јужниот град Рафа, каде што засолниште од нападите најдоа над милион Палестинци, пред инвазијата на градот на 6 мај.
– Поддршка за паузата во снабдување на оружје прогласена од Бајден –
Резултатите покажаа дека над 51 отсто од американските Евреи ја поддржуваат одлуката на претседателот Џо Бајден да ја запре испораката на оружје за Израел во периодот на неговата копнена офанзива во Рафа, во јужниот дел на Појасот Газа.
Според анкетата, 22,5 отсто од испитаниците силно ја поддржале одлуката на Бајден, додека 29,9 отсто ја поддржале, 11,7 отсто се против и 10,5 отсто остро се спротивставиле. Други 25,2 отсто ниту ја поддржале ниту се спротивставиле на одлуката.
Откако Израел ја започна својата војна во Појасот Газа, САД му обезбедија силна воена, разузнавачка и дипломатска поддршка на Тел Авив.
– Протестите во кампусите –
Истражувањето покажа дека 34,4 отсто од американските Евреи ги гледаат протестите на универзитетите како антивоени и протести за мир, додека 28,3 отсто ги гледаат како „чисто“ антиизраелски. 25,3 отсто ги сметаат протестите и за антивоени и за антиизраелски, а 11,9 отсто рекле дека не се ниту едното ниту другото.
Од април, на универзитетите во неколку земји, меѓу кои се и САД, Велика Британија, Франција и Шпанија, започнаа протести против израелската војна во Газа и повици до универзитетските администрации да ја прекинат соработката со израелските институции.
На прашањето за нивната поддршка за Израел по протестите, 33 отсто одговориле дека нивната поддршка се зголемила, 43 отсто рекле дека останува иста, а 23,4 отсто рекле дека е намалена.
– Дводржавното решение –
Што се однесува до решението на палестинско-израелскиот конфликт, 60 отсто од испитаниците го сметаат дводржавното решение како „најдобар начин за мир, со различни услови поврзани со демилитаризација и признавање на Израел како еврејска држава“.
Преговорите за мир се во застој од 2014 година, најмногу поради тековните активности на Израел за населување на окупираниот Западен Брег и неговото одбивање за формирање на палестинска држава врз основа на границите од 1967 година, со Источен Ерусалим (Источен Кудс) како главен град.
Анкетата покажа дека 11,5 отсто од испитаниците поддржуваат безусловна независна палестинска држава, додека 24 отсто дале поддршка со услов да се признае Израел како „еврејска држава“.
Понатаму, 16,8 отсто поддржале конфедерација меѓу Израел и палестинска држава со безбедносни договори, 4,8 отсто ја поддржале идејата за палестински „племенски“ емирати и 3,1 отсто дале поддршка за интеграцијата на Палестинците како граѓани на Израел.
Само 5,8 отсто се спротивставиле на целосно формирање палестинска држава, а 8,8 отсто немале мислење за тоа.
Извор: Anadolu Agency (AA)
