Андонис Самарас исклучен од Нова демократија поради остри критики кон владата
Поранешниот грчки премиер и долгогодишен член на Нова демократија, Андонис Самарас, е исклучен од партијата поради неговите постојани критики на владините политики.
Самарас, познат тврдокорен националист и клучен фигура во грчката блокада за Македонија, остро го напаѓаше премиерот Киријакос Мицотакис за „премногу попустлив“ став кон Турција и за политиките што ги нарече „центристички“ и „разбудени“. Неговата критика вклучуваше и неодамна усвоениот закон за истополови бракови, на кој се противеше.
Особена реакција предизвика неговото интервју за весникот „То Вима“, каде што Самарас побара смена на министерот за надворешни работи, Јоргос Герапетритис. Владата го оцени ова како „екстремни лаги и провокации“.
„Г. Самарас… не ги изразуваше само своите мислења, туку покажуваше целосно несогласување со сите владини политики,“ рече портпаролот Павлос Маринакис, објавувајќи го исклучувањето.
Во својата реакција, Самарас изјави: „Овој потег ја покажува ароганцијата и несигурноста на Мицотакис. Партијата веќе не наликува на оригиналната Нова демократија.“
Ова не е првиот конфликт меѓу Самарас и семејството Мицотакис. Во 1992 година, тој беше разрешен од позицијата министер за надворешни работи од Константинос Мицотакис, татко на сегашниот премиер, поради разлики во политиката кон Македонија. Подоцна, во 1993 година, Самарас ја напушти партијата и придонесе за пад на тогашната влада.
Со исклучувањето на Самарас, владејачката партија го одржува своето кревко мнозинство од 155 пратеници во парламентот, но поддржувачите на Самарас и пензионираниот Костас Караманлис може да предизвикаат тензии. Самарас дури предложи Караманлис да ја замени актуелната претседателка Катерина Сакеларопулу, чиј мандат завршува во 2025 година.
ИЗВОР: racin.mk
