ВАШИНГТОН (АА) – Американскиот Стејт департмент престана да обработува барања за пасоши со ознака за пол „X“ откако претседателот Доналд Трамп потпиша извршна наредба со која се признаваат само два пола: машки и женски, според извештаите, пренесува Анадолу.
Според интерна е-порака до која дојде британскиот „Гардијан“, државниот секретар Марко Рубио, во согласност со извршната наредба потпишана од Трамп во понеделникот, ги информирал вработените во Стејт департментот да ги спроведат новите насоки, нагласувајќи: „Политиката на САД е дека полот на индивидуата не може да се смени.“
Во извршната наредба на Трамп се вели дека САД признаваат само „два пола, машки и женски“ што ги опишува како „непроменлива биолошка реалност“.
Во наредбата, со наслов „Заштита на жените од родовиот идеолошки екстремизам и враќање на ‘биолошката вистина’ во федералната Влада“, се бара владините документи за идентификација, вклучително пасоши, визи и други документи за патување, да го рефлектираат „непроменливото биолошко определување како машко или женско“.
Стејт департментот првпат издаде пасоши со небинарната ознака „X“ во април 2022 година.
Вчера вработените во Стејт департментот беа известени да „го суспендираат секое барање за пасош со ознака за пол ‘Х’“ и да „го суспендираат секое барање за промена на ознаката за пол“ во согласност со извршната наредба, според „Гардијан“.
Интернет-страницата „NOTUS“, цитирајќи извори од Белата куќа, пренесува дека извршната наредба од понеделникот не се применува ретроактивно и не ги поништува постојните пасоши, но дека со новата извршна наредба мора да стои полот кој е одреден при раѓање.
Анадолу се обрати до Стејт департментот за коментар, но не доби веднаш одговор.
Извор: Anadolu Agency (AA)
