ХЈУСТОН (АА) – Американската сојузна држава Алабама синоќа го погуби вториот осуденик на смрт со контроверзниот метод познат како азотна хипоксија, јавува Анадолу.
Алан Јуџин Милер (59) беше врзан за подвижно легло, каде што преку маска му е даден азотен гас, процедура во која затвореникот го вдишува гасот додека не го исцрпи целиот кислород од неговиот систем, а потоа умира.
Критичарите сметаат дека методот е суров, болен и мачен, а го осудија и Обединетите нации.
Милер се тресеше и трепереше околу две минути, а неговото тело на моменти се влечеше против стегите, раскажа репортерот што беше санкциониран да биде сведок на постапката. Милер, исто така, помина околу шест минути со периодично „голтање“ воздух пред да почине.
Комесарот на Поправниот оддел на Алабама, Џон Хам, на прес-конференцијата рече дека двеминутното тресење е очекувано.
„Се одеше според планот и според нашиот протокол, така што се одвиваше како што планиравме“, изјави Хам.
Милер беше осуден на смрт во 2000 година за убиство на тројца мажи во 1999 година. Сѐ до крајот тврдеше дека е невин.
„Не направив ништо за да бидам овде“, беа последните зборови на Милер преку маската што му го покриваше лицето.
Гувернерот на Алабама, Кеј Ајви, ја најави егзекуцијата и рече дека постапката за смртна казна со азотен гас е метод што Милер го избрал наместо смртоносна инјекција.
„Вечерва конечно беше задоволена правдата за трите жртви преку методот на егзекуција што го избра затвореникот“, рече Ајви. „Неговите дела не беа лудило, туку чисто зло. Три семејства засекогаш се сменети од неговите грозоморни злосторства и се молам тие да најдат утеха во годините што доаѓаат.“
Алабама го погуби својот прв осуденик на смрт со азотна хипоксија на 25 јануари годинава.
Поддржувачите на азотната хипоксија рекоа дека лицето брзо губи свест, што ја прави похумана од другите методи на извршување смртни казни. Но лекарите рекоа дека не можат конкретно да одредат дали или кога некое лице ќе изгуби свест кога ќе биде изложено на високи дози на азотен гас.
Алабама е единствена американска држава што користи азотната хипоксија за смртните казни. Три сојузни држави – Луизијана, Оклахома и Мисисипи – исто така го одобрија методот со азотен гас, но сè уште не го имплементирале за егзекуции.
Извор: Anadolu Agency (AA)
