Додик вчера во Москва се сретна со рускиот претседател Владимир Путин, каде покрај обвинувањата против американската амбасада во БиХ и амбасадорот Мајкл Марфи, рече дека нивна цел е уништување на Република Српска
Амбасадата на Соединетите Американски Држави во Босна и Херцеговина ги оцени како апсурдни и злонамерни последните изјави на претседателот на Република Српска (РС), Милорад Додик, кој при посетата на Русија го заостри својот проруски, антизападен и антиамерикански курс, пишува регионалниот сервис на Радио Слободна Европа (РСЕ).
Додик вчера во Москва се сретна со рускиот претседател Владимир Путин, каде покрај обвинувањата против американската амбасада во БиХ и амбасадорот Мајкл Марфи, рече дека нивна цел е уништување на Република Српска.
Во реакцијата на американската амбасада во БиХ објавена на Твитер се вели дека САД и Западот не претставуваат закана за Република Српска или за аспирациите на нејзините жители да имаат мирна, демократска и просперитетна иднина.
„Овие закани доаѓаат од Милорад Додик и оние во владата на Република Српска кои се стремат да ги одземат основните права и слободи на жителите на овој ентитет, богатејќи се наместо да работат за просперитетот на оние за кои тврдат дека ги претставуваат, поткопувајќи ја државата Босна и Херцеговина и Дејтонскиот мировен договор, давајќи дестабилизирачки, илузорни и опасни ветувања за независност на Република Српска“,
се вели во објавата на амбасадата на Твитер.
Milorad Dodik’s latest allegations, like most of his claims, are absurd and ill-intentioned. The United States and the West are not threatening Republika Srpska or its residents’ aspirations for a peaceful, democratic, and prosperous future.
These threats are coming from…
— US Embassy Sarajevo (@USEmbassySJJ) May 24, 2023
Соединетите Американски Држави беа и се, велат од амбасадата, пријател и партнер на сите граѓани на Босна и Херцеговина.
„Нашата политика овде е јасна и директна и таква e веќе 28 години. Соединетите Американски Држави го поддржуваат суверенитетот, територијалниот интегритет и мултиетничкиот карактер на Босна и Херцеговина, како и нејзината интеграција во евроатлантските институции“,
се вели во реакцијата.
Претходно денеска, американскиот Стејт департмент, коментирајќи ја средбата меѓу Додик и Путин, изјави дека „ниту една влада, на ниту едно ниво, во овој момент не треба да ја прошири соработката со Русија, додека таа земја врши агресија врз Украина“.
„Патот кој води до демократска, просперитетна и сигурна иднина, која ја посакуваат сите граѓани на Босна и Херцеговина, оди преку Брисел, а не преку Москва. Затоа, патот на Додик го сметаме за контрапродуктивен и пред се штетен“,
изјави портпаролот на Стејт департментот за Гласот на Америка.
Додик е еден од ретките функционери на земја што се сретнал со Путин од почетокот на руската инвазија на Украина. Прорускиот лидер на Република Српска и неговиот Сојуз на независни социјалдемократи го блокираат санкциите кон Русија на државно ниво во Босна и Херцеговина.
Додик често повторува дека Република Српска може да се отцепи од Босна и Херцеговина во која е еден од двата ентитета според Дејтонскиот договор со кој заврши војната во 1995 година. Поради загрозување на тој договор, на стабилноста во БиХ и во регионот, како и поради коруптивни дејствија, тој е на листите на санкционирани на САД и на Велика Британија.
Претседателот на Република Српска во Москва, како што претходно најави, учествува и на меѓународен безбедносен форум, кој се одржува од 23 до 25 мај. Форумот, како што пренесоа руските медиуми се одржува под покровителство на рускиот Совет за безбедност, а делегацијата на земјата домаќин ја предводи секретарот на Советот за безбедност на Русија Николај Патрушев.
Присуството на состанокот во изјава за РСЕ го потврди и претседателот на Демократската партија на Србите во Северна Македонија Иван Стоилковиќ, откако претходно во објава на Фејсбук самиот се пофали дека е во Москва. Детали за патувањето, рекол тој, ќе соопштел откако ќе се врати.
Извор: 360stepeni.mk
