Пред две недели претседателот на АА, Арбен Таравари рече дека во текот на овој мандат албанскиот јазик ќе стане официјален и еднаков со македонскиот, но денеска во Дејли Клик лидерот на Алтернатива, Зеќирија Ибрахими беше порезервиран по ова прашање. Тој рече дека за да се направи ова, најпрво треба да се смени преамбулата за тоа кој е носител на државниот суверенитет.
Зеќирија Ибрахими: Начинот на кој е дефинирана државата го подразбира и начинот на кој се дефинира јазичната политика. Ако во преамбулата на државата имате етникум кој е носител на суверенитетот, во случајов Македонците, јавноста знае кој го напишал овој текст, тоа последователно се рефлектира и во дефиницијата на јазичната политика на Северна Македонија. Со овие закони што се донесени, употребата на албанскиот е унапредена, но за албанскиот јазик да стане официјален јазик на ниво на македонскиот, мора да се смени текстот на преамбулата.
Таравари е убеден дека ова ќе се реализира, сега вие велите дека би требало да биде. Дали сте вие поскептичен?
Зеќирија Ибрахими: Не. Бидејќи јас доаѓам од областа на јазиците, знам дека со вакви работи не треба да се брза и да велиме дека ќе биде. Јас мислам дека г. Таравари е оптимист во овој случај, но бидејќи јас знам како оди дефинирањето на јазичните политики не сакам да давам збор дека ќе стане официјален, бидејќи тоа е поврзано со текстот на преамбулата за тоа кој е носител на суверенитетот. И не може без да се реши прашањето за носител на суверенитетот за да можеме да го решиме прашањето на јазичните политики, затоа сум порезервиран јас. Јас се надевам дека ќе направиме ново унапредување на албанскиот јазик, но не можам да кажам со цела уста дека ќе биде службен и на исто ниво со македонскиот.
Во моментов Ибрахими вели дека се работи да се укине терминот 20% кој се однесува на Албанците како дефиниција за втор службен јазик, односно на албанскиот јазик.
ИЗВОР: ТВ 21
