Албанскиот државен врв го поздрави вчерашниот постигнат договор меѓу Косово и Србија

Разговорите меѓу српскиот претседател Александар Вучиќ и косовскиот премиер Албин Курти, со посредство на Европската Унија, вчера во Охрид, траеја повеќе од десет часа. По состанокот, високиот претставник на Европската Унија за надворешни работи и безбедност, Жозеп Борел, соопшти дека Србија и Косово се согласиле за Анексот за имплементација кој заедно со Договорот ќе биде дел од европскиот пат на двете страни

Претседателот на Албанија Бајрам Бегај го поздрави постигнувањето на јавниот договор меѓу Косово и Србија и посветеноста за спроведување на основниот договор и соодветниот анекс. Според Бегај, овој договор е уште една гаранција за мирот, стабилноста и иднината на регионот во Европската Унија.

„Го поздравувам постигнувањето на јавниот договор меѓу Косово и Србија во Охрид – Северна Македонија и посветеноста за спроведување на основниот договор и соодветниот анекс. Овој договор е уште една гаранција за мирот, стабилноста и иднината на регионот во Европската Унија. Верувам дека гарантите на овој договор ќе го направат обврзувачки и спроведлив за страните. Им благодарам на Европската Унија за нејзиното посредување и на Соединетите Американски Држави за силната поддршка“.

напиша Бегај.

Шефот на Албанската Влада Еди Рама вчерашниот договор го нарече историско достигнување. Тој исто така напиша дека се надева дека „ѓаволот не се крие во деталите“.

„Да се ​​надеваме дека ѓаволот вечерва не се крие во деталите и дека договорениот, но непотпишан договор, не е уште една балканска измама! Во спротивно, ова би било историско достигнување што би ја навестило долгоочекуваната пролет во односите меѓу двата најголеми балкански народи. И искрено да им честитаме на четворицата протагонисти на денешната охридска трпеза, посакувајќи наскоро потпишаниот договор да се претвори во нова неповратна реалност меѓу Косово и Србија, Албанците и Србите, Западен Балкан и Европската Унија“.

напиша Рама.

Разговорите меѓу српскиот претседател Александар Вучиќ и косовскиот премиер Албин Курти, со посредство на Европската Унија, вчера во Охрид, траеја повеќе од десет часа.

По состанокот, високиот претставник на Европската Унија за надворешни работи и безбедност, Жозеп Борел, соопшти дека Србија и Косово се согласиле за Анексот за имплементација кој заедно со Договорот ќе биде дел од европскиот пат на двете страни.

Борел рече дека Договорот и анексот се сметаат за усогласени и прифатени од двете страни и дека ќе се сметаат за усвоени, односно ќе важат, откако тој ќе даде изјава дека е така или со објава од негова страна.