Албанската опозиција со покана до АА – Таравари: Соработката не се прави преку телевизиски дебати

Не престануваат поканите на албанската опозиција до Алијанса за Албанците да ја напуштат Владата и да се приклучат на опозицискиот фронт. Ова денеска го повтори потпретседателот на Движењето Беса, Фатмир Лимани, кој ја покани АА да ги здружи силите со Беса, Алтернатива и Демократското движење.

„Во 7-8 години играње на полето во опозицискиот дух, гласачот на опозицијата, на Алијанса, не заслужува да биде составен дел на влада на криминалот, дури и тие се свесни за тоа. Ќе чекам да го дадат својот одговор во врска со поканата што им ја упативме братски“, вели Фатмир Лимани.

Како одговор на ова, првиот човек на АА, Арбен Таравари, рече дека со повици од дистанца не се остваруваат соработки.

„АА е автономна и сериозна партија, одлуките ги носи во партиските структури, по анализите што ги прави и врз основа на волјата на членството. Во едно сум повеќе од сигурен, дека соработките не се прават со телевизиски дебати и јавни покани“, порача Арбен Таравари.

Претходно, првиот човек на Демократското движење, Изет Меџити од собир во Гостивар и лидерот на Беса, Биљал Касами од телевизиска емисија, ја повикаа Алијанса за Албанците да се приклучи на опозицискиот фронт.