Граѓаните не се доволно информирани за своите права како корисници на поштенски услуги. Агенцијата за пошти им стои на располагање, беше речено на денешниот Информативен караван кој Агенцијата го одржа на Економскиот факултет во Прилеп со граѓани, студенти и претставници од бизнис секторот, а е во соработка со народниот правобранител.
Македонија има 29 даватели на поштенски услуги, од кои 28 се приватни и една е – Македонски пошти како национален оператор. Последниве две години ситуацијата се подобрува, конкуренцијата си го направи своето. Тоа се одрази и во македонски пошти каде се зголемува бројот на поштари и посериозно ги сфатија состојбите.
-Целта е да бидеме поблиску до граѓаните, односно до корисниците на поштенски услуги. Сакавме да информираме за нивните права и обврски, а секако да апелираме и да се користат поштенски услуги од лиценцирани даватели. Досега забележавме дека граѓаните не се доволно информирани за нивните права и ова е еден од начините да ги информираме. Граѓаните не се многу информирани кога и на кој начин да поднесат рекламација кај давателите на поштенски услуги,а потоа да се обратат во Агенцијата за пошти, рече Ана Ковачевска, раководител на Секторот за заштита на правата на корисниците и за односи со јавност во Агенцијата за пошти.
Според состојбите и споредено со другите земји, Македонија е земја со пониски цени на пратки и поштенски услуги. Агенцијата со инспектори контролира и ги открива дивите даватели на услуги.
-Сите даватели на услуги треба да го подобрат квалитетот на услугите, поголем број на вработени, побрза динамика на достава. На веб-страницата на Агенцијата точно е наведено кои се лиценцирани пошти во земјава. Во оваа и претходната година 4 до 5 пошти се затворени кои не ги задоволувале потребите за даватели на поштенски услуги. За дивите пошти ние имаме инспектори сме на терен бараме, меѓутоа тие што се диви не се обележани. Имаме неколку откриени, имаме инспектори, со тек на време ги пронаоѓаме, рече директорот на Агенцијата за пошти, Сретен Миладиноски.
До канцеларијата на народниот правобранител досега немало поднесено претставки.
До народниот правобранител до денес не е поднесена ниту една преставка за повреда на правата на граѓаните од даватели на поштенски услуги. Единствено има случаи кога граѓаните се жалат дека некое друго право им се повредува со неуредна достава на списи, рече Лилјана Илиевска, заменик народен правобранител од Подрачната канцеларија во Битола.
Обемот на пратки лани за 5 проценти се намалил во споредба со 2023 година иако во 2023 година имало консолидација и зголемување за 6 проценти во споредба со 2022 година.
Информативниот караван на Агенцијата за пошти денеска беше во Прилеп, а утре во Кавадарци. Минатата година се спроведе во седум градови, а се очекува да продолжи наесен.
ИЗВОР: racin.mk
