МЕКА (АА) – Масџид ал-Харам, позната и како Светата џамија или Големата џамија на Мека, претставува најсвето место за муслиманите низ светот, јавува Анадолу.
Со седумте минариња, ова архитектонско ремек-дело на исламската уметност секоја година пречекува милиони муслимани што доаѓаат за да го извршат обредот аџилак или умра.
Историјата на оваа Света џамија се протега до времето на пророкот Ибрахим (Авраам) и неговиот син Исмаил, кои ја изградиле Ќаба, кон која муслиманите се насочуваат при секоја молитва.
Ќаба се наоѓа во центарот на Големата џамија и има облик на коцка. Висока е околу 15 метри, а долга 11 метри.
Нејзината покривка се менува секоја година на деветтиот зул-хиџе (месец според лунарниот календар).
Покривката на Ќаба, која се состои од четири дела, е направена од чиста свила, а се изработува машински, како и рачно. При изработката се користат конци од злато и сребро.
Со овие конци на неа се пишуваат различни молитви и стихови од Куранот. Покривката е долга 47 метри, со површина од 657 квадратни метри.
Милиони верници секојдневно ја посетуваат Мека, најсветиот град за муслиманите, за да ја доживеат духовната блискост со Ќаба и со својата вера.
Мека, лоцирана во западниот дел на Саудиска Арабија, е место каде што е роден последниот божји пратеник, Мухамед.
Од овој свет град започна ширењето на пораката на исламот низ целиот свет по објавувањето на светиот Куран.
Извор: Anadolu Agency (AA)
