Климент Танески од Ростуше го извади осветениот крст од водите на Радика, што беше положен од епископ Антаниски, г. Партениј, по повод денешниот голем христијански празник Богојавление – Водици.
-Бог се јави. Навистина се јави. Пресреќен сум. Посакувам многу здравје, среќа и радост на сите и благосостојба во државава, посака Танески, кој е прв ростушанец по повеќе години, кому му се насмевнува среќата.
Куса но многу значајна порака испрати и владиката Партениј.
-Вадењето на светот крст од водите на Радика од страна на ростушанец нека биде за благослов на сите луѓе што живеат во овој крај, благослов за растење и развој на регионот. За многу години. Нека бог ја излее својата благодат за да има на земјата многу мир, многу љубов и меѓу луѓето добра волја, порача владиката.
Овој пат имаше рекордна бројка од околу 300 верници, кои учествуваа во извлекувањето на крстот од бистрите води на реката Радика, кои најпрвин присуствуваа на Божествена Литургија во храмот посветен на Пресвета Богородица во село Ростуше, со која чиноначалствуваше владиката Партениј.
На Литургијата присуствуваа голем број верници, како постојани жители така и оние кои сега живеат во други градови но со своите потомци се тука по повод овој голем празник. Дворот и храмот изгледаа прекрасно, беа преполни со луѓе кои дојдоа да го прослават Богојавлението на Господ Христос, а потоа заедно со монасите и монахињите, во голема литија се спуштија до Радика, каде што се случи големото осветување на водите и полагањето на светиот крст.
По традиција и овој пат на положувањето на светиот крст во водите на Радика присуствуваа претставници на локалната власт на општина Маврово и Ростуше, предводени од градоначалникот Медат Куртовски, кој на Танески му подари два лаптопа.
-Среќен празник на сите православни христијани во нашата општина и во нашата држава. Посакувам здравје, среќа и благосостојба во сечиј дом, посака Куртовски.
Во рамки на одбележувањето на големите празници во Бигорски манастир вечерва во 19 часот ќе почне вечерна богослужба во чест на Свети Јован, додека утре кога се слави соборот на Свети Јован Крстител, во 6:30 Утрена и Божествена Литургија.
ИЗВОР: racin.mk
