Протестот на јавната администрација продолжи денеска во многу министерства и државни институции. Тие директно бараат од премиерот Мицкоски, Владата и Министерството за финансии да најдат средства за зголемување на платите на 2.447 вработени. Ова зголемување би го оптоварувало државниот буџет со 3 милиони евра годишно. Административците се чувствуваат дискриминирани поради разликата во платите на вработените на исти позиции во други државни органи кои имаат колективни договори.
Платите на 70% од вработените во Министерството за култура и туризам се под просечната плата во државата.
Револтирани од изјавите на власта дека овие протести се политички мотивирани, реагираа вработените кои излегоа пред Министерството за култура со долгогодишни барања. Велат дека Синдикатот на УПОЗ во последните три години одржал 3 штрајкови и 20 протести за покачување на платите за 30%, бидејќи моментално дел од вработените имаат плата од 25 илјади денари, а нивниот просек не достигнува ни 30 илјади денари.
„Протестираме 3 години, но Министерството за финансии наоѓа причини поради недостиг на буџет и не дава дозвола за потпишување на колективниот договор. Реагиравме и кај другиот владин состав, барањата продолжуваат да бидат исти, тоа е во интерес на сите. Овде на протестот учествуваат вработени од сите партии и не е точно дека има некаква политичка позадина“, вели Лавдим Фаризи.
Од Синдикатот на УПОЗ велат дека ова не е штрајк како што вчера погрешно толкуваше Владата, туку протест. Првиот човек на УПОЗ Трпе Деановски рече дека се уште не се повикани да седнат на преговарачка маса и доколку одлучат да преземат поригорозни мерки ќе штрајкуваат за да го парализираат целиот државен апарат.
Протестите ќе продолжат и утре пред повеќе министерства и државни институции, а централниот говор ќе се одржи пред Државниот завод за статистика во 11 часот. Од синдикалните организации велат дека нема да се откажат од нивните барања, а во петок главниот протест ќе се одржи пред Министерството за финансии.
ИЗВОР: ТВ 21
