Молк од официјална Софија и по реакцијата на Брисел за изјавата на бугарскиот пратеник Костадин Костадинов. Од Европската Комисија за ТВ 24, ја осудија изјавата на Костадинов. Порачаа дека суверенитетот на државите мора да се почитува и дека за ЕУ неприфатливи се сите изјави кои ги поткопуваат основните вредности врз кои е изградена Европската Унија.
-Како и обично, не коментираме коментари, но потсетуваме дека суверенитетот на државите мора да се почитува. Секоја изјава против или дејствија што ги поткопуваат овие принципи се неприфатливи. Тие се во спротивност со основните вредности на мирот, стабилноста, соработката и добрососедските односи, врз кои е изградена Европската Унија, порачаа од Европската Комисија за ТВ 24.
Костадинов, пратеник во бугарскиот парламент и лидер на партијата „Преродба“ која моментално е трета политичка сила во Бугарија, преку фејсбук статус, минатата недела, ја повика владата во официјална Софија, да објави претензии за припојување на Бугарија со Македонија и Јужна Бесарабија (регион во Украина).
Реагираше македонското МНР, дека очекува официјална Софија да се огради од изјавата на Костадинов, но од таму пристигна само политичка тишина.
ТВ 24 побара став од институциите во Брисел, со оглед дека овие изјави се од политичар кој доаѓа од земја-членка на Европската Унија.
Извор: 24vesti.mk
