Српскиот тенисер Новак Ѓоковиќ откри дека го хранеле со токсична храна за време на неговото апсење на Австралија Опен во 2022 година.
– Кога се вратив дома, почнав да имам здравствени проблеми. Сфатив дека во тој хотел во Мелбурн ме хранеле со храна која ме отрула. Направив некои откритија кога се вратив во Србија. Никогаш никому не го кажав ова јавно, но открив дека во телото имам многу високи нивоа на тешки метали. Имав олово, многу високи нивоа на олово и жива, ги цитира „GQ“ зборовите на Ѓоковиќ.
Поранешниот прв свестки рекет додаде дека се чувствувал како да има грип. Но, по неколку дена од овој едноставен грип, толку му се слошило што морал да биде лекуван дома од екипа на брза помош. Ова се повторило неколку пати, а потоа морал да направи токсиколошки тестови.
Ѓоковиќ вели дека е трауматизиран од неговото депортирање од Австралија во 2022 година.
На почетокот на јануари 2022 година, тој пристигна во Мелбурн за да учествува на Австралија Опен. Меѓутоа, австралиските власти го приведоа поради проблеми со документите за медицинско ослободување од задолжителна вакцинација, му ја откажаа визата и го испратија во карантин. На 10 јануари, судот во Мелбурн ја усвои жалбата на спортистот и нареди негово ослободување и враќање на неговите документи. Но, подоцна министерот за имиграција Алекс Хок повторно му ја откажа визата на Србинот. Федералниот суд на Австралија отфрли уште една жалба против укинувањето на визата на Ѓоковиќ на 16 јануари и му нареди да ја напушти земјата. Следниот ден, 17 јануари, тенисерот се врати во Србија.
Триесет и седумгодишниот Србин е 10-кратен шампион на Австралија опен. Отвореното првенство на Австралија во 2025 година ќе се одржи од 12 до 26 јануари во спортскиот комплекс „Мелбурн Парк“.
Извор: kurir.mk
