Од воодушевеност, до разочараност во само пет дена. На 15 декември почна, на 20 се сликаа задоволни дека се е во ред, а на 24 декември епилогот е премиерот Христијан Мицкоски да биде разочаран и изнервиран што трговците ја измамиле Владата и граѓаните со „Новогодишната кошница“. Оваа акција требаше да биде синоним за добра соработка меѓу Владата и бизнис заедницата, но се претвори во настан каде од една страна поевтинија некои производи, а од друга трговците ги напумпаа цените на останатите животни продукти кои не се дел од кошничката. По вчерашните и денешни остри реакции на Мицкоски, министерот за економија Бесар Дурмиши најави остри мерки кон маркетите, дистрибутерите и производителите кои биле нечесни. Заканите Дурмиши ги упати сам, без вообичаено да бидат до него заменикот и првиот човек на Државниот пазарен инспекторат.
„Доколку продолжат со овакво однесување трговците, како што и најавивме, ќе донесеме поригорозни мерки како што е замрзување на маржите или на цените. Државната пазарна инспекторија е на терен. Според податоците што ги земевме овие 10 дена и од секторот внатре, видовме дека тие производи што не се ставени во „Новогодишната кошница“, цената на тие производи растела“, изјави министерот за економија и труд, Бесар Дурмиши.
Премиерот Мицкоски и денеска остар и ја дополни заканата на Дурмиши дека владата има и други мерки освен замрзнување на цените и на маржите. Но, беше таинствен како би дејствувале.
„Има и други мерки… Кои се тие мерки, може да ни кажете? Ќе бидат граѓаните сведоци, јавноста, во периодот кој што следи“, изјави премиерот Христијан Мицкоски,
За лидерот на опозицијата Венко Филипче, била очекувана измамата со „Новогодишната кошница“ бидејќи премиерот Мицскоски е потчинет и слугува на своите големи бизнис партнери, во случајов и на големите трговци.
„Премиерот лично дозволи трговците да печатат на маката на луѓето. Го слушаме вчера, вели срамота било тоа што го правеле трговците. А токму тој тоа им го дозволи, со недели да ги качуваат цените и молчеше додека сите ние алармираме“, изјави претседателот на СДСМ, Венко Филипче.
Инаку, Дурмиши и Владата дури сега увидоа дека поскапеа маслото, лебот, млекото, млечни производи, шеќерот, солта и друго, иако уште на 16 декември, еден ден откако почна „Новогодишната кошница“ беа предупредени од ТВ21 дека инфлацијата во ноември е 4,3 отсто во споредба со истиот месец лани, а кај храната и безалкохолните пијалаци поскапувањето е дури за 5,7 насто поголемо. Овие податоци се од Државниот завод за статистика и и беа познати на Владата. Поскапувањето исто така може јасно да се види и од податоците на Сојузот на синдикатите на Македонија каде вистинскиот бум на повисоки цени не е во октомври, веднаш по одмрзнување на маржите на 30 септември, туку во ноември, кога се знаеше за „Новогодишната кошница“.
ИЗВОР: ТВ 21
