Сериозни проблеми со цензурата, пропагандата и лоша економска ситуација, во својот Фејсбук статус Жарко Трајаноски, раководител на истражувања во Институтот за медиуми и аналитика ИМА детално ги опиша состојбите кои го шокирале за време на неговото патување во Белград.
„Кога пребарував за Асад и Сирија на англиски, шокирано видов дека на првата страница на Гугл немаше ниту еден прозападен извор. Цензурата беше очигледна“, истакна Трајаноски, нагласувајќи ја загриженоста поради информациската блокада која ја доживеал во српската престолнина.
Трајаноски исто така ја критикуваше радио пропагандата, според која бил потсетен на времето на Слободан Милошевиќ.
„Радиото ми потсети на времето на Слобо, кога медиумите беа под строга контрола“, додава Трајаноски, зборувајќи за стилот на известување во Србија, кој според него има за цел да ја манипулира јавноста.
Што се однесува до секојдневниот живот, Трајаноски изрази загриженост за високите цени на горивата и сообраќајниот хаос.
„Цените на горивата се до небо, и не поминува ден без да се слушне некој како го проколнува Вучиќ за пљачкањето преку руски енергенси“, вели Трајаноски, додека го опишува Белград како град во кој владее општа депресија. „На враќање, Скопје ми изгледаше ко пристоен град“, додава тој, нагласувајќи ја разликата во амбиентот помеѓу двете престолнини.
Трајаноски исто така забележа дека рускиот јазик во Белград е сѐ поприсутен, посочувајќи дека „на Синеплекс има посебни претстави на руски јазик“, што го спореди со употребата на грчкиот во Гевгелија. „Рускиот ми изгледаше како грчкиот во Гевгелија – насекаде“, истакнува тој.
Не пропушти и да го критикува проектот „Београд на води“, кој го смета за кинеско предградие: „Тоа изгледа како кинеско предградие, а Кинески културен центар во Нов Белград е само уште еден доказ за присуството на Кина во Србија“, изјави Трајаноски, додавајќи дека во Белград се чувствува голем степен на зависност од Кина.
Иако критикуваше многу аспекти од животот во Србија, Трајаноски се осврна и на протестите на студентите, кои, како што вели, заслужуваат поддршка.
„Големо браво за студентите. Ме јаде само тајмингот. Се надевам дека протестите нема да издишат како што се случи со квази-отпорот во Македонија по Црниот понеделник во 2012 година“, изјави Трајаноски.
Критиките на српската пропаганда која се обидува да ги дискредитира протестите, според него, потсетуваат на мрачното време во Македонија.
„Обидот на курирско-информерската пропаганда на Вучиќ да ги дискредитира студентите и протестите со црвени кругови, потсетува на едно мрачно време кај нас“, рече Трајаноски, заклучувајќи: „Да не би да се повтори!“
ИЗВОР: racin.mk
