Поплавени улици, тротоари и зелени површини, придружени со насобран смет, станаа секојдневие за жителите на Карпош 4. Веќе шест дена, од пукната водоводна цевка на улицата „Никола Парапунов“ непрекинато истекува вода за пиење. И покрај поставената железна плоча за спречување на излевањето, водата продолжува да прави штета.
Дефектот, според локалното население, претставува сериозен проблем. Некои граѓани стравуваат дека гаражите во близина може да се поплават, особено поради дополнителните врнежи.
„Оваа состојба трае предолго. И улиците Разловечко Востание и Вич се поплавени. Веќе не знаеме што да правиме“, изјави жител за Мета.мк.
Од „Водовод и канализација“ засега нема конкретни информации за санацијата. На бројот за пријава на дефекти кратко потврдија дека ситуацијата е евидентирана и во план е да се реши, но не прецизираа временска рамка.
Новинарските обиди за дополнителни информации преку електронска пошта останаа без одговор, додека жителите повикуваат на итна интервенција за спречување на понатамошни штети.
ИЗВОР: racin.mk
