Градоначалникот на општина Бутел Дарко Костовски најави дека изградбата на новата детска градинка во населбата Бутел 2 се одвива со одлична динамика. Во моментов се одвиваат различни активности, меѓу кои зајакнување и поставување на темели, изолација на објектот и подготовка за поставување на првиот слој од подната плоча.
„Новиот објект ќе биде финилизиран за околу 18 месеци. Ќе се простира на 1800 м2. Ќе има 3 влеза, 7 занимални со 7 спални соби, 2 занимални со заеднички спални соби и една модерна просторија за јасли. Ќе има и посебна просторија за изолација и медицинска сестра како и млечна кујна. Новата градинка ќе има капацитет за 200 деца и ќе ги исполнува сите модерни услови за згрижување на деца од предшколска возраст“, напиша градоначалникот на општина Бутел, Дарко Костовски.
Според Костовски, претходниот објект, изграден во 1964 година, по 60 години ќе биде заменет со нова и модерна градина. Овој проект е капитална инвестиција која се реализира по долги години неисполнети ветувања, носејќи важен развој за граѓаните на Бутел.
