ИСТАНБУЛ (АА) – Израелската армија денес издаде нова наредба за евакуација на жителите од две области на јужните предградија на Бејрут и од пет села во Јужен Либан, јавува Анадолу.
Во одделни соопштенија портпаролот на израелската армија, Авичај Адрае, објави мапи на кои се истакнати целните згради и областите означени со црвено.
Адрае им наложи на жителите во јужните предградија на Бејрут, поточно во областите Харет Хреик и Хадат, веднаш да ги напуштат своите згради и соседните области.
Тој тврди дека во зоните предвидени за напад има „објекти и интереси поврзани со Хезболах“ и предупреди на претстојни израелски воени дејства.
„Евакуирајте ги овие згради и одржувајте растојание од најмалку 500 метри од нив“, истакна портпаролот.
Израелската армија, исто така, издаде наредба за евакуација на жителите од пет села во Јужен Либан: Тајбех, Адчит Ал Кусаир, Деир Серијан, Бурџ Ал Шемали и Маачук.
Адрае во соопштението посочува жителите веднаш да ги напуштат своите домови и да заминат северно од реката Авали.
Израел кон крајот на септември започна прекугранична војна со Либан, почнувајќи воздушна кампања против, како што тврди, позиции на Хезболах.
Според либанските здравствени власти, од октомври минатата година во израелските напади во Либан се убиени речиси 3.600 луѓе, над 5.000 се повредени и повеќе од еден милион се раселени.
Тел Авив го прошири конфликтот со започнување копнен упад во Јужен Либан на 1 октомври.
Извор: Anadolu Agency (AA)
