КОПЕНХАГЕН (АА) – Копенхаген, данската престолнина, познат како „градот на трговците“, привлекува посетители од целиот свет со уникатната комбинација на историја, култура и современ живот, јавува Анадолу.
Со една од најпознатите статуи во Европа, два од најстарите забавни парка во светот и централна област полна со бои и дух, Копенхаген е место каде што се спојуваат класиката и модерното.
Меѓу најпознатите симболи на градот е бронзената статуа на Малата сирена на Едвард Ериксен, која се наоѓа на брегот на Лангелиние, а прикажува сирена што станува човек. Оваа статуа ги привлекува посетителите цела година и ја претставува магичната страна на Копенхаген.
Градот е дом на два од најстарите забавни парка во светот, а најпознат е Тиволи Гарденс.
Сместен во срцето на градот, до централната железничка станица, Тиволи е магнет за туристите, со годишна посетеност од над четири милиони луѓе.
Посетителите можат да уживаат во неговата уникатна атмосфера, возбудливи атракции, ресторани и концерти.
Прочуеното пристаниште Нихавн (Новиот канал) е уште една култна локација, симбол на трговската историја на градот. Оваа област од 17 век, со своите шарени фасади, е задолжително место за посета.
Денес Нихавн е познат по многубројните кафулиња, каде што посетителите може да уживаат во оброк и пијалаци.
Во зимскиот период Нихавн станува божиќен базар што го нуди најдоброто од данската традиција и гостопримство.
Кралската палата Амалиенборг е резиденција на кралицата на Данска и претставува значајна туристичка атракција. Палатата се состои од четири барокни згради, распоредени околу голем плоштад, а две се отворени за јавноста. Неизоставен дел е и смената на стражата што се одржува секој ден напладне.
Копенхаген е познат и по модерната урбана архитектура, како што е Копен Хил – центар за производство на енергија и рекреативен простор со ски-патека, пешачки патеки и ѕид за качување. Овој уникатен проект ја претставува посветеноста на градот кон одржливост и иновации.
Островот на хартијата, исто така, има важна улога за градот, од бродоградилиште и воена болница до складишта за јаглен и хартија.
Повеќето копенхагенци го помнат како место каде што биле складирани хартии и токму ова му го дава името Остров на хартијата.
Копенхаген е редовно рангиран како еден од најсреќните градови во светот, а се издвојува со смирениот ритам на живот и либералните социјални ставови.
Извор: Anadolu Agency (AA)
