Загадувањето на воздухот не е проблем што може да се реши во четири месеци власт предводена од ВМРО-ДПМНЕ. Нивото на загаденост на воздухот е високо затоа што опозиционите душегрижници, СДС и ДУИ седум години на власт не направија ништо и не преземаа никакви системски мерки кои до сега би дале ефект, објави владејачката партија во денешново соопштение.
„Владата предводена од ВМРО-ДПМНЕ сериозно и посветено работи на спроведување и изнаоѓање решенија за системско решавање на проблемот со загадениот амбиентален воздух.
Амбиенталниот воздух, посебно е загаден во зимските денови со почетокот на грејната сезона, што јасно става до знаење дека начинот на затоплување на домовите е еден од причините за загаденоста.
За таа цел, Владата веќе реализираше една од мерките за субвенциите за инвертер клими за граѓаните која ќе продолжи и понатаму. Дополнително, Владата исто така, ќе обезбеди субвенции и за фирмите кои ќе користат чисти енергетски решенија.
Исто така, ќе се воведат строги ограничувања за најштетните извори на енергија и ќе се контролираат најголемите индустриски загадувачи. Освен ова, Владата ќе започне и програма за масовно пошумување и засилено чистење на јавните простори“, стои во соопштението.
-Сите овие мерки од кои што дел веќе се имплементираат, паралелно со забрзаната гасификација на Македонија и изградбата на когенеративната централа, ќе значат долготрајни решенија за намалување на загаденоста на воздухот и кои на среден рок ќе обезбедат почиста животна средина, потенцираа од партијата.
ИЗВОР: kurir.mk
