По повод Денот на ослободувањето на Битола, 4 Ноември, во Центарот за култура се одржа свечена академија на која беа доделени наградите. Градоначалникот Тони Коњановски во своето обраќање истакна значењето на денешниот ден и напредокот на градот во изминатата година. Тој потсети на жртвите и храброста на предците и на важноста на продолжување на нивното наследство преку развојот на Битола.
„Вечерва се потсетуваме на борбата и храброста на нашите предци, на направените жртви, но и на издржливоста на нашиот народ, во очекувањето на светлината на новата зора, исполнета со надеж и можности. Оние кои некогаш сонуваа за посветла иднина, презедоа акција за да го направат сонот – реалност. Наследството живее во нашата посветеност да ги поддржуваме вредностите на слободата, правдата и мирот. Наша должност е да се погрижиме нивните жртви никогаш да не се заборават, а лекциите од историјата да не водат во нашата потрага по подобро утре. Токму затоа, денес продолжуваме да се бориме со нашите интелектуални капацитети за понатамошен раст на Битола, нејзин развој и напредок во сите области, пред се преку активна вклученост на младите во сите области на делување“, изјави Коњановски.
Во текот на последните денови, од 26 октомври, се организирани бројни настани поврзани со спортот, културата и уметноста. Градоначалникот се пофали и со победата на фудбалскиот клуб „Пелистер“ над „Вардар“, како и со напредокот во инфраструктурата, кој е основа за економски развој.
Во текот на годината, локалната самоуправа реализираше важни инфраструктурни проекти кои ја подобрија животната средина и ја збогатија културно-туристичката понуда на Битола. Во таа насока, градот привлече нови инвеститори, меѓу кои и оние за Индустриската зона Жабени и трговскиот центар БЛИС.
Традиционално, по доделувањето на наградите, програмата беше збогатена со културно-уметнички настапи од локални уметници и културни друштва, кои ја прикажаа историјата и културната важност на Битола.
ИЗВОР: ТВ 21
