Напорите за фискална консолидација на новата Влада се препознаени од меѓународните финансиски институции и за тоа даваат поддршка. Ова го истакна министерката за финансии Гордана Димитриеска-Кочоска од Вашингтон по средбите со високи претставници на Меѓународниот монетарен фонд и Светската банка.
-На состаноците истакнавме дека фискална консолидација не можеме да направиме преку ноќ и дека за тоа е потреба време. Најважно е дека покажуваме желба којашто може да се види од Фискалната стратегија којашто е усогласена и предвидува намалување на буџетскиот дефицит на 4% за 2025 година. Тоа е она што е најважно, истакна министерката во изјава за ТВ Алфа.
Таа потенцира дека особено радува фактот што на состаноците е забележано дека и таа како министер за финансии и новата Влада максимално вложуваат напори да ги подобрат резултатите на државата и дека максималните напори што ги вложуваат се препознаени од страна на претставниците на меѓународните финансиски институции.
Изрази уверување дека престои одлична соработка во наредниот период и вложување напори во водење политика со постепена фискална консолидиција, внимателно трошење на буџетските средства и истовремено преземање мерки за борба со сивата економија.
Министерката за финансии во Вашингтон учествува на Годишните средби на ММФ и СБ, каде што имаше и состаноци со високи претставници на овие меѓународни финансиски институции.
ИЗВОР: kurir.mk
