Во новите израелски напади во Либан убиени се 14 лица

БЕЈРУТ (АА) – Најмалку 14 лица се убиени во денешните израелски воздушни напади врз Либан, објавија државните медиуми, пренесува Анадолу.

Израелски воен авион истрела проектил врз автомобил во областа Алај, источно од Бејрут. Во нападот се убиени две лица, јави државната новинска агенција ННА.

Седум лица ги загубија животите, а 14 се повредени во вториот воздушен напад врз куќа во градот Ходор, во источен Либан.

Напад со дрон е извршен врз мотоцикл во јужниот град Тир, убивајќи едно лице. Во воздушниот напад врз градот Бурџ Калауија во јужен Либан убиен е градоначалникот.

Еден офицер на либанската армија и двајца војници се убиени при евакуација на ранетите во градот Јатер, се вели во соопштението на армијата.

Израел минатиот месец изврши масовни воздушни напади низ Либан врз, како што вели, цели на Хезболах.

Најмалку 2.574 луѓе се убиени од октомври минатата година, објавија либанските здравствени власти.

Израел ја започна својата копнена инвазија врз јужен Либан на 1 октомври.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.