Два посилни земјотреса утринава ја погодија централна Турција

Двата земјотреса – првиот со јачина од 4,2, вториот со јачина од 4,7 степени според Рихтеровата скала – утринава ја погодија централна Турција. Освен од овие два, овој регион утринава е погоден и од низа земјотреси со послаб интензитет

Во период од околу еден час централна Турција утринава беше погодена од два посилни и низа земјотреси со послаб интензитет.

Првиот посилен земјотрес што утринава ја погоди Турција е со јачина од 4,2 степени според Рихтеровата скала, а е регистриран во 9:25 часот по локално време.

Европскиот медитерански сеизмолошки центар (ЕМСЦ) објави дека земјотресот бил на длабочина од пет километри, а е регистриран на 66 километри северозападно од градот Кахраманмараш – еден од градовите кој беше погоден од катастрофалниот земјотрес на 6 февруари.

Вториот посилен земјотрес што ја погоди централна Турција утринава е со јачина од 4,7 степени според Рихтеровата скала и е на длабочина од пет километри. Земјотресот, според ЕМСЦ, е регистриран во 10:36 часот по локално време на 66 километри северозападно од градот Кахраманмараш, а 6 километри западно од Гексун.

Освен земјотресите со интензитет од 4,2 и 4,7 степени, утринава централна Турција е погодена од низа послаби земјотреси чии интензитети се движат во интервал од 3 до 3,5 степени според Рихтеровата скала.

Минатата недела Турција беше погодена од земјотрес со јачина од 7,8 степени според Рихтеровата скала, кој беше почувствуван и во Сирија. Како последица на земјотресот досега во двете земји се пријавени над 41 000 загинати, а илјадници други се повредени.

Според процените на Обединетите нации, бројот на загинати во земјотресот би можел да надмине 50 000. Станува сѐ помалку веројатно дека спасувачите би можеле да најдат уште преживеани под урнатините.