Во атарот на струшкото село Глобочица, денеска околу пладне, е пронајдено безживотното тело на 60-годишен жител на Струга, кој пред два дена бил пријавен за исчезнат, потврди за МИА портпаролот на СВР Охрид, Стефан Димоски.
Според него, телото на К.М. не покажувало траги на насилство, а смртта била констатирана од медицинска екипа.
Полициска екипа, во присуство на јавен обвинител, извршила увид на местото на настанот, а телото на починатиот е предадено на обдукција.
Лицето било пријавено за исчезнато во понеделникот доцна попладне во реонот на селото Брчево, каде што собирал шумски плодови и не се вратило во својата викенд куќа, а не била воспоставена ниту телефонска комуникација.
По него трагала екипа на полицијата, Планинската спасителна служба (ПСС) при Црвениот крст Охрид и локалното население.
ИЗВОР: ТВ 21
