Милиони луѓе во Куба сѐ уште се без струја

ХАВАНА (АА) – Милиони Кубанци сѐ уште се без струја, известува Анадолу.

Извештаите покажуваат дека дефектот во електраната „Антонио Гитерас“ во Матанзас што се случи во петокот остави голем дел од Куба во мрак.

Властите објавија дека по интензивни напори, напојувањето почнало да се обновува во некои области, вклучувајќи го и главниот град Хавана.

Околу 80 % од земјата сепак сѐ уште е без струја, а во некои региони имало прекин во работата кој траел и повеќе од 30 часа.

Сликите објавени на социјалните мрежи покажуваат дека меѓународниот аеродром „Хозе Марти“ во Хавана е обвиен во темнина.

Во меѓувреме, претставниците на одделот за енергетика, кои се состанаа под водство на претседателот Мигел Дијаз Канел, направиле проценка на мерките за решавање на оваа криза.

Куба често се соочува со недостиг на електрична енергија поради проблемите во електраните, кои произлегуваат од несоодветното одржување на објектите кои ги изгради Советскиот Сојуз пред повеќе од 40 години.

Министерството за енергетика и рударство соопшти дека земјата годишно троши осум милиони тони гориво, од кои само три милиони тони се од домашно производство.

Економското ембарго ја принуди Куба за своите енергетски потреби најмногу да се потпира на Венецуела, Русија и Мексико.

Последниве години кубанската влада почна да изнајмува пловечки електрани за да ги ублажи застоите и да ги зголеми производствените капацитети.

Претседателот Дијаз Канел на социјалната мрежа X објави дека напорите за решавање на недостигот на електрична енергија ќе продолжат со несмалено темпо додека ситуацијата не се подобри.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.