Министерот за администрација, Горан Мирчев, вчера рече дека укинувањето на Балансерот добило зелено светло во текот на претходната власт, чиј дел беше и ДУИ, кои дадоа зелено светло за усвојување Националната стратегија за Реформи во јавната администрација 2023-2030 година, каде се истакнува дека Балансерот веќе не е потребен.
Но тоа што не го рече Минчев е дека во тој период освен ДУИ дел од Владата беше и Алтернатива која е дел од коалицијата ВРЕДИ, дел од актуелната власт. Но не само тоа, Алтернатива во тоа време управуваше со Министерството за јавна администрација. Тоа денеска го истакна екс пратеничката на ДУИ, Арта Билали Зендели.
„Стратегијата во влада за реформи во јавната администрација е предложена од министрите од тоа време, кои беа министри на актуелните политички партии кои ја сочинуваат коалицијата ВРЕДИ“, вели Арта Биљали Зендели.
Од едно пребарување во системот ЕНЕР, лесно може да се најде драфт текстот на стратегијата за реформи во јавната администрација. Тој е објавен на 9 февруари 2023 и надлежна институција е токму министерството од тоа време кое се нарекуваше “информатичко општество и администрација“, а во тој период министер беше Адмирим Алити од Алтернатива.
Ако кликнеш на верзијата 2 од драфт текстот, се отвора Стратегијата која конечната форма ја доби во февруари 2023, во последниот месец од мандатот на Адмирим Алити по кого во овој ресор дојде Азир Алиу од АА, крилото на Таравари.
На 48 страница од овој текст во делот насловен “Деполитизација на јавната администрација“ меѓу другото се вели дека “….во фазата пред донесување на одлуката за избор секако треба да се води сметка и за начелото на соодветна и правична застапеност на припадниците на заедниците. На овој начин, од една страна се надминува потребата од примена на алатката наречена „балансер“, која во пракса предизвикува бројни злоупотреби, а од друга страна останува примената на начелото на соодветна и правична застапеност на припадниците на заедниците.”
Како и да е, овој акт никогаш не доби зелено светло во Собрание, појасни денеска екс пратеничката од ДУИ, Биљали Зендели.
Биљали Зендели додаде дека Стратегијата за реформи во јавната администрација се користи за дефокусирање од одлуката на Уставен суд за укинување на декларацијата за етничката припадност при вработувањето, одлука која ја нарече скандалозна и убиствена. Оваа одлука како што рече, му нанесува голема штета на Рамковниот договор и мултиетничкото општество во земјава.
ИЗВОР: ТВ 21
