ГАЗА (АА) – Хасан Хамад, кој како хонорарен снимател (фриленсер) материјали ѝ испраќал и на АА, го загуби животот во нападот што израелската армија го изврши во северниот дел на Појасот Газа, известува Анадолу.
Телото и заштитниот елек на Хасан Хамад, кој го загуби животот во израелското бомбардирање на неговата куќа во бегалскиот камп Цибалија, беа донесени во болницата „Кемал Адван“ во Појасот Газа.
Мохамед Хамад, брат на палестинскиот новинар Хасан Хамад, изјави дека само по косата можел да го препознае својот брат, кој дошол кај него да го сними движењето на израелските тенкови, бидејќи по нападот телото му распарчано.
Мохамед Хамад рече дека неговиот брат од вчера известувал за нападите на Израел врз северните делови на Појасот Газа.
– Бројот на убиени новинари во Појасот Газа од 7 октомври 2023 година се зголеми на 175
Канцеларијата за медиуми на владата во Газа објави писмено соопштение во кое се наведува дека палестинскиот новинар Хасан Хамад го загубил животот во израелското бомбардирање на неговата куќа во бегалскиот камп Цибалија.
Се истакнува дека бројот на новинари убиени во израелските напади во Појасот Газа од 7 октомври 2023 година е зголемен на 175.
Во соопштението се повикуваат меѓународната заедница и меѓународните организации поврзани со медиумите „да воведат санкции кон Израел за да престане да убива палестински новинари и да се преземат мерки да му се суди пред меѓународните судови за злосторствата што ги извршил“.
Извор: Anadolu Agency (AA)
