САРАЕВО/МОСТАР (АА)
Најмалку 15 лица загинаа во текот на ноќта и утрово во поплавите во Босна и Херцеговина, јавува Анадолу.
Според официјалните информации од надлежните институции, 14 лица загинале во поплавите и одроните на подрачјето на Јабланица, додека потврдено е и дека едно лице загинало во Фојница.
Раководителот на Секторот за односи со јавноста при Владата на Херцеговско-Неретванскиот Кантон (ХНК), Дарко Јука, го потврди бројот на жртвите во подрачјето на северниот дел на кантонот.
„Со големо жалење можам да констатирам дека до овој момент се пронајдени 14 тела и за жал со тенденција да се зголеми оваа и онака трагична бројка. Има многу повредени, за жал меѓу нив и потешко повредени. Службите прават сѐ што можат на терен за повредените да ги однесат до најблиските медицински установи, а на самото место да им укажат помош на помалку повредените како и на оние кои го загубиле имотот, оние кои се одвоени од своите најблиски, се згрижуваат во центрите во Јабланица, Коњиц“, изјави Јука.
„Ситуацијата во Коњиц сега е малку постабилна. Последните информации се дека возилото на итната помош успеало да се пробие меѓу Коњиц и Јабланица и дека е изграден некаков привремен коридор за да може да се дојде до луѓето. Во моментов најкритична е состојбата на подрачјето на Доња Јабланица, која е целосно отсечена од останатиот дел од округот, односно од светот. Станува збор за целосно пропаднати патишта и пруги. Поради тоа сообраќајот е во целосен прекин“, истакна Јука и додаде дека се предизвикани многу свлечишта и дека под вода се големи површини, а уништени се и неколку мостови на реката Дрежанка.
Според неговите зборови, повредените се извлекуваат со чамци, обезбедени од Вооружените сили на Босна и Херцеговина и нуркачките клубови, како и со пловни објекти на Цивилната заштита на ХНК.
„Од три часот по полноќ, кога беа добиени првите информации во нашиот центар, на терен се сите расположливи сили во однос на луѓе, опрема и технологија. Значи, зборуваме за Цивилна заштита, пожарникари, брза помош, полиција, ГСС, Црвен крст. Премиерката ги алармираше сите нивоа на власт во Босна и Херцеговина, таа е во постојана комуникација од државно до ентитетско ниво“, објасни Јука.
Тој особено ги предупреди граѓаните на Босна и Херцеговина да ја сфатат сериозноста на ситуацијата и да не тргнуваат на пат кон Коњиц и Јабланица од која било насока, бидејќи тоа ќе предизвика дополнителни проблеми. Полициските патроли на локациите Салаковац и Брадина не дозволуваат премин кон Јабланица или Коњиц.
– Претседателството на БиХ изрази сочувство до семејствата на настраданите во поплавите
Членот на Претседателството на Босна и Херцеговина, Жељко Комшиќ, изрази сочувство до семејствата на настраданите во поплавите.
„Изразувам искрено сочувство до семејствата на настраданите во поплавите кои ја погодија нашата земја. Во овие тешки моменти изразувам длабока солидарност со граѓаните кои се погодени од временските непогоди и стојам на располагање за секаков вид помош“, изјави Комшиќ.
Тој додаде дека институциите на Босна и Херцеговина ќе ги преземат сите мерки за што побрзо да се санираат последиците од поплавите и да му биде укажана соодветна помош на населението.
– Вооружените сили ангажирани за помош на загрозените цивили од поплавите
По добиеното одобрение од Претседателството на БиХ, на барање на Министерството за безбедност на БиХ, ресурсите на Вооружените сили на Босна и Херцеговина (ОС БиХ) беа ангажирани за помош на цивилното население кое е загрозено од поплавите.
Во операцијата за спасување учествуваа хеликоптер, инженерски машини и пешадиски единици на Вооружените сили на Босна и Херцеговина.
Извор: Anadolu Agency (AA)
