АТИНА (АА) – Главната грчка опозициска левичарска партија Сириза денес истакна дека праведното решавање на палестинското прашање е итно бидејќи конфликтот што започна во октомври минатата година продолжува да ескалира и да се шири, јавува Анадолу.
„Контиунираната ескалација на израелската војна врз Либан создава услови за пошироко разгорување на огнот на Блискиот Исток со последици кои не можат да се контролираат и со цивилни жртви“, се вели во соопштението на партијата.
Потсетувајќи на своето претходно предупредување дека „нова регионална војна без правила со големо страдање на цивилното население е неизбежна со импликации што ги надминуваат географските граници на Блискиот Исток“, партијата нагласи дека апелот на генералниот секретар на ОН, Антонио Гутереш, за итен прекин на огнот треба итно да се слушне.
„Истовремено, итно е постигнувањето праведно решавање на палестинското прашање врз основа на меѓународното право“, се додава.
Во меѓувреме, во видео изјава, шефот на грчката Комунистичка партија Димитрис Куцубос повика на повлекување на сета поддршка за државата Израел.
Во спротивно, тој рече: „Грчката Влада би презела огромни одговорности затоа што ќе го одведе нашиот народ во поопасни авантури и ќе го направи нашиот народ цел на одмазда“.
Синоќа, Иран изврши голем ракетен напад врз Израел како одмазда за атентатите на лидерот на Хамас, Исмаил Ханије, челникот на Хезболах, Хасан Насрала, и на командантот на Иранската револуционерна гарда.
Регионалните тензии ескалираа поради бруталната офанзива на Израел врз Појасот Газа, во која убиени се над 41.600 Палестинци, главно жени и деца, по нападот на Хамас во октомври минатата година.
Конфликтот се прошири во Либан, а Израел започна смртоносни напади низ целата земја, во кои од 23 септември убиени се над 1.073 луѓе, а повредени речиси 3.000.
Извор: Anadolu Agency (AA)
