АНКАРА (АА) – Израелската Армија денес тврди дека убила водач на Хамас на северниот окупиран Западен Брег, јавува Анадолу.
Армијата соопшти дека нејзините сили го погодиле возилото во кое е убиен Васем Хазем, лидерот на мрежата на Хамас во Џенин, на северниот окупиран Западен Брег.
Се додава дека израелските сили убиле уште двајца Палестинци, Мисбах ал-Машарка и Арафат Амр, кои биле во возилото.
Засега нема коментар од Хамас за израелските тврдења.
Израелската Армија денес ја продолжи воената офанзива во градот Џенин и нејзиниот бегалски камп на северот на Западниот Брег трет ден по ред.
Израелската Армија во средата ја започна најголемата воена офанзива од 2002 година во градовите Тулкарм и Џенин, како и во бегалскиот камп Ал Фара кај Тубас, при што според палестинските податоци загинаа 16 Палестинци.
Тензиите се зголемени низ окупираниот Западен Брег поради бруталната израелска офанзива на Појасот Газа, во која загинаа повеќе од 40.600 Палестинци, главно жени и деца, од 7 октомври минатата година.
Најмалку 670 Палестинци оттогаш се убиени, речиси 5.400 други се повредени и над 10.300 уапсени на окупираната територија, според палестинските податоци.
Меѓународниот суд на правдата на 19 јули ја прогласи повеќедецениската окупација на Палестина од страна на Израел за незаконска и побара евакуација на сите населби на Западниот Брег и во Источен Ерусалим.
Извор: Anadolu Agency (AA)
