Иако во предизборието ВМРО-ДПМНЕ најави дека покрај економските ќе ги намали и бројот на замничките директорски места, како и членовите во управни и надзорни одбори, новото предложено законско решение во кое ќе се именува втор заменик директор во Царинската управа го покажува сосема спротивното.
Ова директорко место ќе ги чини граѓаните најмалку 150.000 денари кои би се однесувале на платата, а дополнителни средства би се трошеле на службено возило, административен персонал на заменикот итн.
Предлог законот веќе се наоѓа во Собранието и се очекува набрзо да се изгласа, а предлагачи на оваа измена се Бобан Карапејовски од партијата ЗНАМ, Бојан Стојаноски од ВМРО-ДПМНЕ, Даниела Белимова од ЗНАМ, Жаклина Пешевска од ВМРО-ДПМНЕ, Миле Цеков од ЗНАМ, Павле Арсоски од ЗНАМ и Тони Јаревски од ВМРО-ДПМНЕ.
Во моментот на директорското место на Царина е поставен Бобан Николовски кој доаѓа од редовите на ВМРО-ДПМНЕ, додека на позицијата заменик директор е Гарип Каба од редовите на „Вреди“, а според информациите на Рацин.мк се очекува новиот директор да биде од ЗНАМ.
Споре актуелниот закон, раководната структура во Царинската управа е директор и заменик директор, а тоа што се дополнува е дека на овие позиции се отвара ново заменичко место со цел подобро вршење на работите.
-Со Законот за Царинската управа се уредуваат и надлежностите, опфатот на работите и структурата на Царинската управа. Со Предлог-законот тие се доуредуваат, а со измените ќе се дорегулира раководната структура и ќе се обезбеди подобро извршување на надлежностите на Царинската управа. Со предложеното решение ќе се обезбеди поефикасно и поефективно вршење на работите од надлежност на институцијата и ќе се дорегулира раководната структура, нагласуваат предлагачите.
ИЗВОР: racin.mk
