ГАЗА (АА) – Најмалку девет Палестинци загинаа, а неколку се повредени во вторникот во израелски воздушен напад на пазар во градот Деир ал Балах во централна Газа, соопшти медицински извор.
„Една жена и две деца се меѓу жртвите“, изјави изворот за Анадолу.
Тој додаде дека бројот на загинати најверојатно ќе се зголеми бидејќи голем број од ранетите се тешко повредени.
Израелската војска ја класифицираше областа која беше цел на нападот како „безбедна зона за цивилите“ за време на тековната офанзива на Израел врз Појасот Газа.
Пазарот беше преполн со луѓе во моментот на нападот бидејќи се наоѓа во близина на станицата што ја опслужува областа Маваси западно од Хан Јунис, која Израел ја класифицираше како „безбедна зона“ за палестинските цивили.
Нападот се случи набргу по вчерашниот израелски напад на училиште во кој се убиени најмалку 12 Палестинци, место во кое засолниште побараа раселените лица во Газа.
Израел систематски гаѓа цивилни објекти, вклучувајќи училишта, болници и верски објекти, во текот на својата офанзива врз Појасот Газа, и покрај резолуцијата на Советот за безбедност на ОН со која се бара итен прекин на огнот.
Во израелските напади врз Газа од 7 октомври досега се убиени повеќе од 40.170 Палестинци, главно жени и деца, а повредени се над 92.740, објавија локалните здравствени власти.
По повеќе од десет месеци од почетокот на израелската војна, големи делови од Појасот Газа се разурнати.
Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине воената операција во јужниот град Рафа, каде што повеќе од милион Палестинци побараа засолниште од војната пред градот да биде нападнат на 6 мај.
Извор: Anadolu Agency (AA)
