Лекарите од Универзитетската клиника за детски болести каде се лекуваат пациентите со цистична фиброза повеќе пати до сега аларамирале до министерството за здравство за недостигот од лекот креон.
Од клиниката велат дека започната е постапка за регистрација на нов препарат со кој што ќе може да се третираат овие пациенти. Лекарите се надеваат дека процедурите наскоро ќе завршат.
– Повеќе пати до сега алармиравме во Министерство за здравство за недостаток на панкреасни ензими. Министерството за здравство сериозно го сфати тоа, бараше препарати, но недостаток е на светско ниво. Во постапка е регистрација на нов препарат во нашата земја, според наши информации постапката е стигната до МАЛМЕД. Се надеваме дека ќе се заврши наскоро. – велат од Универзитетска клиника за детски болести.
Од Агенцијата за лекови пак велат дека и до нив стигнале реакции од пациенти за ограничените количини на лекот и тврдат дека веќе се обидуваат да го обезбедат лекот дополнително и од друг производител за да се покријат потребите на пациентите кои го користат.
– По добиената информација од носителот на одобрението за промет за највен недостиг и ограничување во снабдувањето кое би можело да трае до 31.12.2025 година, заради голема глобална побарувачка и ограничени производни капацитети, Агенцијата ќе пристапи кон разгледување на други законски постапки за обезбедување на потребниот лек од друг производител со цел надминување на недостатокот и навремена испорака до пациентите. – велат од Агенција за лекови МАЛМЕД.
Пациентите веќе со месеци не можат да го најдат лекот во земјава. Дел од нив досега го набавувале од соседните земји, но во изминатиов период велат дека и таму тешко се наоѓа.
Од Асоцијацијата за цистична фиброза објаснуваат од какво значење е овој лек за нивната здравствена состојба.
„Настанува премногу голем проблем заради недостатокот на креон дури и трикафтата за која се боревме долго време не може комплетно да се искористи во комбинација со неа, така што има пациенти кои веќе комплетно се без креон, тоа значи дека храната не им се обработува и не може добро да се апсорбира лекот.“ – вели Ивана Атанасоска од Асоцијацијата за цистична фиброза.
Недостигот од креонот се појавувал повремено и претходно, но овој пат веќе трае со месеци и пациентите бараат што побрзо надлежните да најдат решение и да обезбедат доволно количини.
Извор: 24vesti.mk
