Хезболах ги евакуираше своите позиции во Либан, откако Израел се закани со одмазда за ракетниот напад врз анектираната Голанска висорамнина.
Нападот, во кој загинаа 12 лица, ги зголеми стравувањата од прошиирување на конфликтот, откако со месеци трае судирот меѓу израелските сили и палестински Хамас во Појасот Газа. Либанското шиитско движење Хезболах, кое веднаш по нападот, негираше дека ја истрелале ракетата која го погоди игралиштето во Мајдан Шамс, веќе се повлече од неколку позиции на јужниот и источниот дел на Либан кои би можеле да бидат цел.
Во прекуграничните престрелки кои се засилија од октомври, загинаа повеќе од 450 лица во Либан – од кои стотина цивили. Израел тврди дека 23 цивили и 17 војници се убиени во нападите на Хезболах. Во изминативе месеци престрелките беа релативно ограничени, Израел и Иран се обидуваа да избегнат директна конфронтација, но најновиот напад ги промени плановите и на двете страни.
„Членовите на кабинетот ги овластија премиерот и министерот за одбрана да одлучат за начинот и времето на одговорот против терористичката организација Хезболах.“ – вели Кабинет за безбедност на Израел.
Од иранската влада предупредија дека секој, како што го нарекоа, ирационален напад на Израел може да предизвика војна во целиот регион. Меѓународната заедница побара од двете страни да прекинат со нападите пред ситуацијата да излезе надвор од контрола.
Во меѓувреме, Француската национална авиокомпанија ги суспендираше летовите до Бејрут а германската влада ги повика своите граѓани веднаш да го напуштат Либан, наведувајќи дека во секој момент може да биде суспендиран воздушниот сообраќај во земјата. Од Белата Куќа пак директно го обвинија Хезболах за нападот.
„Овој напад го изврши либанскиот Хезболах. Тоа беше нивна ракета истрелана од област што ја контролираат. Нашата поддршка за безбедноста на Израел е цврста и непоколеблива пред сите закани што доаѓаат од Иран, вклучително и Хезболах.“ – изјави Адријана Вотсон портпаролката на Советот за национална безбедност.
Израел ја презеде контролата врз Голанската висорамнина од Сирија за време на војната во 1967 година а целосно ја анектираше во 1981 година. Мнозинство од жителите не ја прифаќаат израелската националност иако тел авив со децении управува со регионот.
Извор: 24vesti.mk
