Американскиот претседател Џо Бајден ѝ се обрати на нацијата првпат откако во неделата објави дека се повлекува од изборната трка, и порача дека е загрижен за иднината на американската демократија.
Бајден вели дека се повлекол за да ѝ овозможи на нова генерација да го преземе факелот. И покрај повиците од републиканците веднаш да поднесе оставка, Бајден најави дека ќе го одработи својот мандат до јануари 2025.
„Ја почитувам оваа функција, но уште повеќе си ја сакам земјата“, изјави Бајден во 11-минутното обраќање од Белата куќа.
– Ништо не смее да ни се испречи на патот за да ја спасиме нашата демократија и тоа ги вклучува и личните амбиции. Затоа одлучив дека најдобар пат напред е да го пренесеме факелот на новите генерации, тоа е најдобар начин да ја обединиме нацијата. – изјави Бајден.
Веднаш по обраќањето на Бајден, на својата социјална мрежа се огласи поранешниот претседател и републикански претседателски кандидат на ноемвриските избори, Доналд Трамп. „Говорот на расипаниот Џо Бајден од Овалната соба беше едвај разбирлив и многу лош!“, напиша Трамп. Потоа Трамп објави уште еден пост во него стил, целиот со големи букви.
„Расипаниот Џо Бајден и лажливата Камала Харис се огромна срамота за Америка – никогаш не сме биле во вакво време!“
Изборната кампања во трката за претседател на САД меѓу потпретседателката Камала Харис и поранешниот претседател Доналд Трамп почнува без јасно водство на едниот или на другиот, покажува анкетата на Си-Ен-Ен објавена денеска откако претседателот Џозеф Бајден одлучи да не се кандидира за втор мандат. Трамп, додека Бајден беше во трката, водеше пред него со шест поени разлика.
Откако доби подршка од Бајден и од другите демократи почетна позиција на Харис во однос на Трамп е подобра од онаа на Бајден – Трамп ужива поддршка од 49 отсто од анкетираните регистрирани гласачи, а Харис 46 отсто.
Извор: 24vesti.mk
