Во Владата ќе имаме двајца заменици-министри и тоа за одбрана и за земјоделство, како и три министерства од кои Правда и Здравство се сигурни и третото ќе биде или за информатичко општетсво или заменик-премиер за економски прашања, рече Таравари
Централното претседателство на Алијанса за Албанците на вечерашниот состанок донесе одлука АА да биде дел од Владата. Ова го изјави лидерот на АА, Арбен Таравари, по средбата. „Организиравме и референдум во партијата за да го чуеме гласот на членовите. Добивме фидбек од повеќето членови на Алијанса за Албанците дека е добро АА да биде дел од Владата. Исто така, и повеќето членови на централното претседателство донесоа одлука, со пакетот што го испрезентиравме пред нив, Алијанса за Албанците да биде дел од Владата“, рече Таравари.
Алијанса за Албанците, како што рече Таравари, во Владата ќе има три министерски и две заменик-министерски места.
„Во Владата ќе имаме двајца заменици-министри и тоа за одбрана и за земјоделство, како и три министерства од кои Правда и Здравство се сигурни и третото ќе биде или за информатичко општетсво или заменик-премиер за економски прашања“,
додаде Таравари.
Тој додаде дека ова се одлуките, а дека за кадровските решенија ќе продолжи централното собрание и ќе се разговара.
„Најверојатно утре ќе имаме состанок со премиерот Димитар Ковачевски на кој ќе ги потпишеме веќе синхронизираните програми и можеби утре ќе се дадат имињата за идните можни министри и заменици-министри“,
рече лидерот на АА.
Во однос на тоа дали Алијанса за Албанците ќе добие и директорски места во институции, Таравари рече дека и на тие позиции ќе имаат свои луѓе, но сепак остава прво да се избере Влада, па потоа ќе се назначат директори.
„Во периодот што е пред нас ќе се знае и кои се институциите што ќе ги раководи Алијанса за Албанците. Нашата мисија е оваа година да ја направиме разликата во раководење со одредени институции и, се надевам, да се постигне целта на нашата мисија“,
рече Таравари.
На прашањето дали Алијанса за Албанците преговара со Алтернатива на Африм Гаши, која е дел од владејачкото мнозинство, Таравари само кусо на македонски јазик рече дека тие преговараат само со премиерот.
ИЗВОР: 360stepeni.mk
