ИСТАНБУЛ (АА) – ХАЛИЛ ИБРАХИМ МЕДЕТ –
Поранешниот малезиски премиер Махатир Мухамед изјави дека цивилизацијата што е праведна, која го следи владеењето на правото, ослободена од угнетување и има слобода, денес повеќе не постои, сето тоа е уништено од луѓето што ги осмислиле и ги вовеле овие вредности, јавува Анадолу.
Мухамед ги изнесе своите ставови за непочитувањето на меѓународните вредности, структурата на Обединетите нации (ОН), поддршката на Западот за тековниот геноцид во Појасот Газа, глобалниот поредок и младите низ светот што протестираат против неправдите во глобалниот поредок и израелскиот геноцид во Газа.
На прашањето да ја појасни неговата неодамнешна изјава дека „човечката цивилизација заврши со отфрлање на темелните вредности што ги произведе“, Мухамед рече:
„Човештвото во текот на неколку века ги разви основните вредности што ги прифаќаме денес. На пример, човековите права, правото на живот, светоста на животот, слободата на изразување. Тоа се нешта што ги прифаќаме и ги цениме. И покрај тоа, поддршката што САД и европските земји му ја даваат на Израел додека Израел спроведува геноцид врз Палестинците во Газа покажува дека тие не се грижат за човековите права, не размислуваат за светоста на животот, па дури и му помагаат на Израел да врши геноцид со тоа што го снабдуваат со оружје, бомби и ракети за убивање Палестинци. Тоа покажува дека ги напуштиле темелните вредности што ги промовираа во минатото.“
Нагласувајќи дека не водат сметка за човековите права, не размислуваат за светоста на животот, туку го поддржуваат израелското убивање на палестинскиот народ, Мухамед рече:
„Затоа ги напуштија сопствените вредности. Значи, цивилизација што е праведна, која го следи владеењето на правото, нема угнетување и има слободи, денес повеќе не постои. Сето тоа е уништено од луѓето што ги осмислија и ги воведоа тие вредности.“
Додаде дека тоа што се случи со палестинскиот народ во Појасот Газа е нешто што никој не го очекувал.
„Мислевме дека целото човештво ќе го почитува владеењето на правото, дека нема да биде угнетувач, дека нема да врши масакри и дека нема да се поддржуваат криминални дела. Затоа мора да го преиспитаме посебно однесувањето на западните сили. Слободата и слично, тие беа оние што ги бранеа таквите идеи, сега тие всушност се луѓе што ги отфрлаат своите идеи“, рече Мухамед.
Тој, исто така, рече дека западните земји можат да кажат дека Израел има право да се заштити сам себе. Меѓутоа, ако Израел има право на безбедност, безбедност им е потребна и на Палестинците.
„Израелците 70 години ги угнетуваа Палестинците. Градеа населби на палестинските територии, подигнуваа ѕидови, го зедоа Ал Кудс за свој главен град. Сето ова е спротивно на меѓународното право и против Палестинците. Проблемот е што Европејците секогаш го поддржуваат Израел, дури и кога Израел прави меѓународни злосторства“, порача Мухамед и заклучи:
„Нашиот проблем е што Европејците го создадоа Израел и сега сакаат да го бранат Израел дури и кога тој прави злосторства. Велат дека го прават тоа затоа што Израел мора да има безбедност. Но безбедност му е потребна и на палестинскиот народ. Значи, ако го угнетувате палестинскиот народ, палестинскиот народ има право да преземе нешто против Израел и мислам дека тоа го направи на 7 октомври минатата година.“
Извор: Anadolu Agency (AA)
