ТЕХЕРАН (АА) – Предвремените претседателски избори во Иран одат во вториот круг откако ниту еден од кандидатите не успеа да добие 50 % од гласовите, покажуваат првите неофицијални резултати објавени денес, известува Анадолу.
Изборната комисија денес објави дека по пребројувањето на гласовите најголем број гласови, 10,4 милиони освоил кандидатот на реформисти и поранешен министер за здравство, Масуд Пезешкиан.
Неговиот ривал, конзервативниот кандидат Саид Џалили, кој беше главен нуклеарен преговарач и шеф на највисокото тело за безбедност, е втор со освоени 9,4 милиони гласови.
Зад нив е претседателот на парламентот, Мохамад Бакер Калибаф, со 3,3 милиони гласови, додека поранешниот министер за внатрешни работи Мостафа Пурмохамади доби нешто повеќе од 206.000 гласови.
Во првиот круг гласаа околу 40 % од граѓаните со право на глас, што не ги исполни очекувањата за поголема излезност на овогодинешните избори.
Вонредните претседателски избори во Иран се одржуваат откако претседателот Ебрахим Раиси загина во хеликоптерска несреќа минатиот месец.
Вториот круг од изборите ќе се одржи на 5 јули, а двајцата кандидати имаат недела дена за кампања и телевизиски дебати пред изборите.
Гласањето на предвремените претседателски избори се одржа во вчера, а изборните власти трипати го продолжија гласањето пред да бидат затворени гласачките места на полноќ.
Според државните медиуми, на овие избори право на глас имаа околу 61 милион луѓе, од кои мнозинството се млади луѓе. На претседателските избори во 2021 година, право на глас имаа 59,3 милиони луѓе.
Гласачите во Иран своето право на глас можеа да го дадат на 58.640 избирачки места ширум земја, од кои над 6.000 беа во главниот град Техеран.
Извор: Anadolu Agency (AA)
